«Ár zamannyń óz surqyltaıy bar» degendeı kez kelgen qoǵamda zamanaýı erkin, qoǵamdyq talap sheńberine syıa, ózindik qalyptasqan beınesi bar jandar bolady. Olar jaıly bıik minbelerden jarqyn maqtaýlar aıtylmaýy da múmkin, ómirde ataq pen dańq ta kóp buıyrmaýy da ǵajap emes... Óıtkeni mundaı jandar ataqtan da adamı sıpatyna, rýhanı bolmysqa kóp mán beredi. Laýazym ańsamaıdy, bes kúndik jalǵanda tıyn sanap kún keshpeıdi, márttigimen, jigitke tán namys, aǵaǵa tán qamqor kóńilmen ómir súredi. Ómiri buralań joldarǵa toly, jumysqa bir syzyqpen baryp, sol syzyqpen qaıtpaıdy, aǵysy qatty ózendeı ózindik arnasy bolady. Sondaı jandar qatarynda Ál-Farabı atyndaǵy Qazaq ulttyq ýnıversıtetiniń fılologıa jáne álem tilderi fakúltetiniń qazaq til bilimi kafedrasynyń ustazy, fılologıa ǵylymdarynyń kandıdaty, dosent Asylbek Tasymov ta bar edi, biz búgin ustazymyz týraly estelikterdi ótken shaqta baıandaıyz...
Asylbek Tasymovpen tanystyǵym osydan otyz eki jyl buryn bastalypty. Saryaýyz balapandarsha oqýǵa túskenge deıin eshteńe oılamasaq ta, kúzgi aýylsharýashylyq jıyn-terin naýqanynan oralǵanda jataqhanaǵa ornalasý mashaqaty baryn bildik. Sol kezdegi Talǵar aýdanyna qarasty Gornyı gıgant kolhozynyń «Vostok» bólimshesinde fılologıa fakúltetiniń bir top birinshi kýrs stýdentteri alma jınap oraldy. Tasymov degen famılıa maǵan jataqhana berilmegenimen esimde qalǵan edi... Jataqhana berilý tártibi týraly shala uǵym bárimizde bar, biraq ony alýdyń artynda túrli talaptardyń baryn jáne ol talaptarǵa saı kelýdiń qıyn ekenin sonda túsindik...
Asylbek Tasymov fılologıa fakúltetiniń sol kezdegi dekany fılologıa ǵylymdarynyń doktory, profesor Tursynbek Kákishevtiń tárbıe boıynsha orynbasary eken. «Jataqhana – óz úıiń» dep turatyn bes jyl stýdenttik ǵumyrymyzdyń basy 1986 jyldyń kúzinen bastaý alsa da Asylbek aǵaıdyń bar bolmysyn sabaq berý tisilinen, orys bólimindegi biraz tájirıbesinen, stýdenttermen el aralap shyqqan fılologıany tereń uǵyný úshin júrgiziletin dıalektologıa jáne fólklor salasy boıynsha oqý-óndiristik praktıkalar men keńes dáýiriniń aýylsharýashylyq jıyn-teringe kómekke stýdent jastardy jumyldyratyn kúzgi naýqanynan bildik.
Asylbek Tasymov birinshi kýrsta «pýnktýasıa jáne orfoepıa erejeleri» degen arnaıy kýrstan dáris berdi. Sabaqta balapansha aýzymyz ashylyp tynysh tyńdap otyramyz, aǵaıdyń orfoepıa máselesine qatysty ádistemelik biraz qyzyǵy este. Aty-jónimizdi surap, starostaǵa jazǵyzǵan tizimge synaı qarap, ózi erinbeı ornymyzdan turǵyzyp, taǵy da tegimizdi aıtqyzady. «Munysy nesi?» dep, tańǵalamyz, sóıtsek, orfoepıa zańdylyǵyna saı sóılep turmyz ba, joq pa degendi óz ádisimen teksergeni eken. Óz maqamymen úndestik zańyna sala bir sozyńqyrap aıtyp beretin de, bizdiń birneshe ret qaıtalaýymyzdy suraıtyn. Oryssha jazylǵan tegimizdi pálenbaı jyl solaı aıtyp úırengen aýyz birden aǵaıdyń maqamymen aıtýǵa ilese almaı qalady. Sonda da tyrysamyz, aǵaıdyń munysyn keıin túsindik, jazý tili men aıtylýy bólek dúnıelerge basqa qazaq mán bermese de, fılolog nazarynan tys qalmaýy kerek eken...
Asylbek Tasymov 1939 jyly naýryzdyń 9-ynda Ońtústik Qazaqstan oblysynyń (qazirgi Túrkistan oblysy) Túrkistan aýdany Qyzyl sharýa aýylynda dúnıege kelgen. Bastaýyshty óz aýylynda oqyp, orta mektepti Túrkistan qalasynda bitirgen. 1957 jyly Almatyǵa kelip, QazUÝ-ge fılologıa fakúltetine oqýǵa túsýge qujat tapsyryp, emtıhandardy jaqsy tapsyrsa da, konkýrstan ótpeıdi. Aýyl jaqqa qaıtýdyń ornyna osynda jumys istegenin jón dep sheship, bir jyl qurylysta túrli jumys isteıdi. Kelesi 1958 jyly QazUÝ-ge konkýrs taǵy úlken bolaryn sezip, sol kezdegi Almaty shet tilderi pedagogıkalyq ınstıtýty, qazirgi Abylaıhan atyndaǵy Qazaq memlekettik shetel tilderi jáne halyqaralyq qatynastar ýnıversıtetiniń «fransýz jáne qazaq tili» mamandyǵyna oqýǵa túsedi. 1963 jyly osy mamandyq boıynsha oqýdy aıaqtap, Túrkistan qalasynda fransýz tili muǵalimi bolady. 1964 jyly Almatyǵa qaıta oralady, Qazaq sovet ensıklopedıasynda ǵylymı redaktor bolyp qyzmet isteıdi. 1971 jyly Qazaq KSR Ǵylym akademıasy Til bilimi ınstıtýtynyń aspırantýrasyna túsedi. 1975 jyly akademık Á. Qaıdar jetekshiligimen «Edil boıy qazaqtarynyń tildik erekshelikteri» atty kandıdattyq dısertasıa qorǵaıdy. Dısertasıa jazý barysynda Reseıdiń Astrahan, Volgagrad, Saratov, Qalmaq ólkesinde tildik zertteý jumystaryn júrgizedi. 1980 jyly sol kezdegi S.M.Kırov atyndaǵy QazUÝ-diń fılologıa fakúltetine dosenttik konkýrstan ótedi, burynǵy qazirgi qazaq tili, keıinnen qazaq fılologıasy, sońǵy jyldardaǵy ońtaılandyrý úderisi talaptaryna saı ózgertilgen qazaq til bilimi kafedrasynda ómiriniń sońyna deıin oqytýshylyq qyzmet atqardy. A. Tasymov ustazdyq qyzmetke adal boldy, aqtyq demi taýsylǵansha stýdentterge fılologıanyń qyr-syrynan, onyń ishinde dıalektologıa ǵylymy men orfoepıa, orfografıa máselelerinen dáris berýdi toqtatpady.
Asylbek Tasymov 200-den astam ǵylymı-ádistemelik maqala men ondaǵan oqý quraly, 3 oqýlyqtyń avtory. 2004 jyly Qazaqstan Respýblıkasy Ǵylym jáne bilim mınıstrliginiń «QR bilim berý salasynyń qurmetti qaıratkeri» degen marapatqa ıe boldy. Qazaq dıalektologıasy, orfoepıa, saýat máselesi, sóıleý mádenıeti jaıly jazǵan jáne buqaralyq aqparat quraldarynda sóılegen birneshe saǵattyq efırde sóılegen sátteri de til janashyry ekenin kórsetse kerek. Qazaq radıosynda jyldar boıy júrgizilip kelgen jýrnalıs Ońǵar Quralulynyń til tazalyǵy jaıly suqbat-habaryna qatysyp, respýblıka halqyn radıo arqyly durys sóıleýge baǵyttap kelgeni de barshaǵa málim. Ózi turatyn kóshe, úıge jaqyn aıaldamadaǵy keleńsizdikter týraly da merzimdi basylymdardyń biri «Almaty aqshamy» gazetinde qoǵamdyq pikir týdyra alǵanyn da ǵalamtor betterinde saqtalǵan maqalalardan kórýge bolady.
Ardaqty ustazdyń alǵashqy kórgende túri qatal, susty bop kóringenimen sabaqta arasynda anekdot aıtýǵa da ýaqyt tabatyn sátteri bar edi. Birinshi kýrsta arnaıy pándi júrgizgen sabaǵynyń birinde estigen kúlkili qaǵytpa áńgimemiz este, ol Qojanasyrdyń bazardan balta taýyp alǵany jaıly bolatyn. «Eı, halaıyq, temir taýyp aldym, saby aǵash» dep, «temir» sózin qattyraq, al «aǵash» sózin aqyryn aıtatyn jerinde akterlik sheberlikpen daýsyn ózgerte aıtqanda, sahnada júrgendeı janyn sala aıtatyn, stýdentter berilip tyńdap, erkin kúletinbiz. Asekeńniń kez kelgen jaǵdaıdy ázil-qaljyńǵa aınaldyra alatyn ádemi kúlkili shymshyma áńgimeleri men birqaqpaılary óte kóp.
1987 jyldyń kúzinde aǵaı bastap fılologıa fakúlteti stýdentteri Qostanaı oblysy, Komsomol aýdany, «Stansıonnyı» sovhozyna kartop jınaýǵa bardyq. Tórt kún poıyzda ish pysady, vagonda jata-jata án salamyz, «Tasymov aǵaı shahmat oınaıtyn qaısyń bar dep jatyr», – dep, joǵary kýrstyń bir jigiti kelip tur. Aldynda ǵana 1-kýrsqa jańa túsken Ázimhan Ybyraıymov degen stýdentti jeńip alǵan men júreksine «men» dedim. Vagon aralap jettim, aǵaıdyń janynda sol kezdegi orys tili kafedrasynyń aǵa oqytýshysy Era Kamılevna degen áıel jáne bir er adam bar eken, ustazdardyń biri bolar, qazir esimde joq, úsheýi otyr eken. Jastyqtyń jalaýy jelbirep kýpesine kirip bardym. Mektepte eptep oınap júrgen shahmatyma senimim azdaý bolsa da qorqyp kórmegen ádetpen otyra qalyp-aq fıgýralarmen oınadym, aǵaı «osy qyz ne oınap jetistirsin» dedi me eken, qasyndaǵylarmen áńgimege alańdap otyryp, qorǵanysyn ashyq qaldyrdy. Az ýaqyttan soń «shah» turmaq, «mat» qoıdym. Eki qasy qustyń qos qanatyndaı tikireıe qarap, shoń muryny deldıip, tańǵalysyn jasyrmaı, aýyl-aımaǵymdy, kimder tárbıelegen ekenin, shahmatty kimnen úırengenimdi bárin surady. Keshe ǵana «jataqhanadan oryn joq, Almaty oblysy ekensiń»,–degen susty Tasymovtan maqtaý estigenge tóbem kókke jetkendeı boldym. Qolyma birneshe alma ustatyp jiberdi...Jeńistiń dámi qandaı tátti! Menen buryn qasymdaǵy kýrstas qyzdar máz bolǵan... Qostanaıdaǵy bir jarym aıdaı ýaqytta aǵaı bizge qataldyǵynan da aǵalyq qamqorlyǵymen este qaldy. Jıynǵa kómekke kelgen ózbekstandyq shopyrlar jigittik jasap, boıjetken qyzdarǵa tıisip júrmesin dedi me, jańbyrda tońsaq, kabınaǵa eki qyzdan baryp jylynyp otyrý týraly sheshim shyǵarǵan, munysy da qazir oılasaq, jón eken. Keshke túgendep jatqan ornymyzǵa kiretin, aǵaıdyń kózi baıqamaıtyn nárse joq edi...Erinbeı sanap alatyn, taqtaı nar ústindegi top qyz renjisek te, tártiptiń aty – tártip, túgendeý kezinde syrtta júrmeıtin boldyq. Qostanaı saparynan soń aǵaıdy burynǵydan da adamgershilik turǵysynan tanı tústik. Kelgen soń jataqhana tártibine jaýapty Asylbek Tasymov kún demeı, tún demeı, «Aýrý – astan, daý – qaryndastan» degendeı, qyzy kóp fakúltet bolǵan soń máýeli baqsha jemisine kóz satýshy da kóp, sol kezdegi №8 jataqhanany (qazirgishe aıtsaq, stýdentter úıin) tekserýge aıaq astynan kele qalatyn. Esik aldynda qyzyl jıgýlı markaly kólik tursa, uzyn dáliz bos bolatyn. Kólik ketisimen, bólmelerden dombyra daýsy kúmbirlep, bir jerden bizden joǵary kýrsta oqıtyn Tóleýbek «Qyzyl bıdaı» dep ándetse, dálizdiń ekinshi jaǵynan, Dosymbek «Kerim-aý, aıdaı» dep sozatyn... Aǵaı dálizde júrgende óship turǵan jaryq janyp, abyr-sabyr bop jatqanda, aǵaı kóligin jol jaqqa qoıyp, qaıta keletin. Qyz bar jerde qyzyq kóp... Ustalyp qalǵandarmen tárbıelik áńgime júrgiziletin. Qysqy sesıa kezinde kýrstasym Gúlmıra N. ekeýmiz Medeý muz aıdynyna baratyn boldyq. Ál-Farabı jaqqa jolǵa shyǵyp, taksı ustamaq bop ótken kólikterge qol kóterip turmyz, kún aıazdy, sýyq edi. Oıqastap qyzyl jıgýlı toqtady. Artqy esikti ashsaq, rúlde Tasymov Asylbek aǵaı otyr... Otyrǵyzyp aldy da, «Borandy kúni ıt pen bala qutyrady» degen maqaldy aıta otyryp, biraz aqylyn aıtyp, kún sýyqta ol jaqta júrgenshe emtıhanǵa daıyndalýyyz keregin eskertip, Fýrmanov kóshesine burylǵan jerden «ary qaraı avtobýspen baryńdar», dep tastap ketti. Basymyz salbyrap jataqhanaǵa qaıtqanbyz... Asylbek aǵaımen 1988 jyly sol kezde dosent, fılologıa ǵylymdarynyń kandıdaty, fólklortanýshy Shákir Ybyraev (qazir fılologıa ǵylymdarynyń doktory, profesor, Kókshetaý memelekettik ýnıversıtetiniń rektory) basqaryp, bizdiń kýrs qazaq ádebıetinen fólklorlyq jáne qazaq til biliminen dıalektologıalyq oqý-óndiristik praktıkaǵa Qaraǵandy oblysy, Qarqaraly aýdanyna jol tarttyq. Kýrstastar birneshe aýylǵa bólindik, biri qazirgi N.Ábdirov aýyly, burynǵy «Beıbitshilik» sovhozyna, ekinshisi «1-Maı» dep atalatyn sovhoz, qazirgi ǵaryshker, halyq qaharmany Toqtar Áýbákirovtyń atyndaǵy aýyl,úshinshisi sol kezde «Vostok» dep atalatyn eldimeken, sosyn birsypyrasy «Besoba» degen jerge, men bastaǵan jeti qyz ǵaryshkerdiń atyndaǵy aýylǵa bólindik. Jastyqtyń óz jeli men jeligi bar kez, qazirgideı mobıldi baılanys joq zamanda aǵaı erinbeı sol sovhozdar arasyn keıde ekeýlep Shákir aǵaımen, keıde jalǵyz tekserip kelip ketetin. «Ádemi qyz aıtqanda, ótirik te ádemi» dep Qadyr aqyn aıtqandaı, keıde ótirigimiz uıqassa, keıde kelispeı qalatyn. Asekeń sezimtal, suńǵyla kisi, jeti turmaq toǵyzynshy sezimin iske qossa da bárin uǵatyn, bárin bilip qoıatyn... Ol jaqta bolǵan oqıǵalardy jazsa, ol óz aldyna bir áńgime. Aıtarym, aǵaıymyzdan ol jaqta da ustazdyq talap pen qarapaıymdylyq, qyz balalarǵa degen erekshe janashyrlyqty barynsha sezdik. Asylbek aǵaı shymyr, myǵym kúsh ıesi edi, maıysyp pedagog ekenmin dep sıpaqtap turmaıtyn, kerek tusta tóbeleske daıyn jigitterdi alyp uratyn, qoldary sportshyǵa tán shapshań, sasqalaqtaýdy bilmeıtin, keýdemsoq jigitterdi qalpaqtaı ushyryp, táýbesine keltiretin. Sodyr degender mundaıdan soń aǵaıdy aınalyp ótetin. Budan keıingi kýrstardyń biri Alakól mańaıynda ótken stýdentter praktıkasynda aǵaı sol jergilikti mekendegi aýyldyń buzaqy balalarynyń eń serkesi degenin avtobýs esiginiń aldyna turyp alǵan jerinen qolynan julqı burap, laqtyra alar kúshiniń baryn kórsetkenine kýá bolǵan da adamdar bar. Aǵaı 2011 jyly ótken bizdiń kýrs túlekteriniń QazUÝ bitirgenimizdiń 20 jyldyq kezdesýine de kelip, erinbeı sońyna deıin taýdaǵy bas qosýǵa da qatysty, kópshiligimiz balamen shyqqan ekenbiz, olarǵa atalyq batasyn berdi.
Ýnıversıtettiń fakúltetaralyq qysqy oqytýshy-professorlar quramy arasynda ótetin dástúrli olımpıadaǵa da Asekeń baryn salyp qatysatyn. Janyna jankúıer retinde ǵalym dostaryn jınap ákelip, jasynyń ulǵaıǵanyna qaramastan ústel tenısinen jarysqa túsetin. Dostyqqa adal, qolynan kelgen kómegin kez kelgenge kórsetýge asyǵatyn, onyń til tabysa biletin qasıetiniń arqasynda talaı qazaq qalalyq tirkeý qıyn zamanda tirkeýli bolyp, páter kezegine ilingen edi. Ǵalymdar Á. Nurmaǵambetovpen, T. Qońyrov, K. Qusaıynov sıaqty zamandastarymen qaljyńy jarasatyn, ǵylymı jetekshisi akademık Á. Qaıdarmen, bıyl kóktemde ǵana ómirden ozǵan akademık Sh. Sarybaevpen ázilderi bir tóbe, syılastyqtary uzaǵynan bolǵan edi.
Tańerteń jaıaý júrýdi ádetke aınaldyrǵan aǵaı ózimen birge jaıaý júretin seriktester taýyp, jańa qonysy «Aqkent» yqshamaýdanynda da tańǵy serýendi jalǵastyryp otyrǵanyna myna bir jaıt kýá. Ýnıversıtettiń dene shynyqtyrý jáne sport mamandyǵynyń 1-kýrsynda oqıtyn stýdentterge boks óneri, onyń tarıhy týraly dáris barysynda túsindire kele boks óneri boıynsha alǵashqy qazaq bapkerin bile me eken degen oımen suraq qoıdym. Orys bóliminiń sportshy jastary ishinen boksqa qatysatyny joq ekenin bilip alǵanmyn. Shvedov Stanıslav atty stýdent «men bilem» degendeı, ornynan qozǵaldy. Meniń ózim endi bilip jatyrmyn, bul ne bilsin degendeı, senimsizdikpen jaýabyn tyńdaıyn dedim. S. Shvedov Almatynyń batysynda jańa salynǵan yqshamaýdan «Aqkentte» Shoqyr Bóltekuly atyndaǵy kóshe baryn, ol adamnyń qazaq boksshylaryn daıyndaýda óz úlesi baryn aıtty. Bul málimetti qaıdan biletinin suradym. «Men aty-jónin bilmeımin, bir úlken kisi bar, estýimshe, ol osy ýnıversıtette oqytýshy, sol «Aqkentte» turady, tańerteń shaldarmen birge jaıaý júredi, bir top jastar júgiremiz, sol kisi birde demalyp otyrǵanymyzda: « Myna kóshe kimniń atynda, Shoqyr Bóltekuly degendi bilesińder me?» – dedi, biz «joq» destik. «Sonda ol osy Sh. Bóltekulynyń boksshy ekenin, chempıon ekenin, boks úıirmesin ashqan jattyqtyrýshy ekenin aıtty», – dedi. Keıinnen aǵaımen úzilisterdiń birinde kafedrada qazaq sporty jaıly, onyń ishinde, boks týraly sóz bastalyp, Shoqyr Bóltekuly týraly estelik aıtty, sol kezde osy S. Shvedovtyń aıtqany eske tústi, aǵaıdan suraǵanymda jastarǵa ol jaıly málimet berýden jalyqpaıtynyn bildim. Stýdentime jolyqqan qarıa osy Asylbek Tasymov ekenin uqtym. Sport taqyrybynda estigenderim sanamda áli saırap tur, kópshilik bile bermeıtin nebir jaıttardy bilip, sportshylarǵa da til úıretý maqsatynda oqý quralyn jazýǵa taptyrmas qundy málimetter aldym. Aǵaıyndy boksshylar Mahmud, Muhtar, Rashıd, Erik Omarovtar týraly estigenimdi aǵaı óz estelikterimen tolyqtyrdy. Sporttyń boks túrimen shuǵyldanǵanyn burynnan da estigenmin, bul joly onyń jattyqtyrýshylary jaıly, ataqty boksshy, talaı sport sheberiniń jattyqtyrýshysy Jandos Kókimovpen birge jattyqqanyn da bildim.
Orys aýdıtorıasyna sabaq berýde de aǵaıdyń óz qoltańbasy bar. 1990 jyldyń jeltoqsan aıynda aǵaıdyń QazUÝ-dyń zań fakúltetiniń orys tobynda júrgizgen sabaǵyna bitirýshi stýdent retinde tájirıbe almasý maqsatynda qatystym. Qazirgi bilikti zańgerdiń birazy keńes zamany bolsa kúshi bar 1989 jylǵy Tilder týraly zańǵa sáıkes sol jyldary Asekeńniń aldynda sasqalaqtap qazaqsha til syndyrǵandar qatarynda boldy, olardyń birsypyrasy qazirge deıin aǵaıdy qurmetpen eske alady. Orynsyz talap qoımaıtyn, syılasqannyń quly bola alatyn, pendelik usaq minezden aýlaq turatyn ustaz-oqytýshylyq qyzmettiń barlyq tusynda da abyroıly bola bildi. «Seniń orysshań táýir eken, kafedra ashylsa, sonda oqytýshy bolyp qalsań qaıtedi, aspırantýraǵa tús»,- degendi aıtyp, oqytýshy bolýdan qashpaýymdy eskertetip, men jaıly marqum profesor, ýnıversıtettiń orys bólimine arnalǵan qazaq tili kafedrasynyń irgesin qalaýshy Talǵat Saırambaevqa qulaqqaǵys jasaǵanyn da keıin, munda bildim...
Kafedra teorıalyq bilim beretin irgeli pándermen qatar respýblıka boıynsha qazaq til biliminen dısertasıalyq ǵylymı keńesi bar úlken ujym bolǵandyqtan, kóptegen dısertasıalardyń talqylaýy ótetin. Doktorlyq dısertasıalardan da kandıdattyq dısertasıalar talqylaýy qyzyq ótetin, mundaıda aǵaı qaljyńdap otyryp, eshkimniń namysyna, aryna tıer tirlik jasamaı, ázilmen ǵana kemshiligin aıtyp, pikir bildiretin. «Artynan shaı-paı iship otyryp, beıresmı taǵy aıtam ǵoı», –deıtin... «Shaı-paı» sózi unap, jastar jaǵy talqylaýdyń tez aıaqtalýyn kútkendeı, jymyń ete túsýshi edik... Zertteý jumysyna syn aıtý degen osy eken dep tapyraqtap ketpeı, naqty jáne negizgi oıyn qysqa tujyrymdaıtyn. Altyn ýaqytty ysyrap etpeýdiń de sheberi eken ǵoı!
Kafedramyz bólek kezde memlekettik til kafedrasy jaǵynda jańa oqytýshy kelinshek jumysqa tursa, dálizden meni kórse, kelgen oqytýshynyń kúıeýi bar-joǵyn suraıtyn. Osy jaǵy sizge nemenege kerek degendeı bop, qashqaqtasam: «Qandaı bolsa da jas áıeldiń eri bolǵany jaqsy, erkegi joq áıel –noqtasy joq mal sıaqty, bas ıesiz ketedi», – deıtin. Eldiń kúıeýin túgendep osy kisi de deıtinbiz... Kópshilik Asekeńniń bul minezin túsinbeıtin. Baıqasaq, qyz balanyń turmysynyń sátti, tútininiń túzý shyqqanyna mán beredi eken ǵoı.
Jınalystarda bola almasa nendeı jańalyq bolǵanyn surap, aıyna eki-úsh ret telefonyma habarlasatyn. Keıde jumys jaıyn surap, keıde jınaqqa shyǵar ǵylymı maqalasynyń sońyna tirker túıindemeni oryssha aýdarýymdy ótinip, telefon soǵatyn da, aıaq jaǵyn estigen jańa anekdotymen aıaqtap, kúldirtetin. Byltyrǵy jaz basynda da ádettegideı telefonym shyryldady, asyǵys edim, «Tasymov» dep aty shyǵyp tur, amalsyz aldym. Amandyq –saýlyq surastyq, daýsy báseń shyqty. Jumysta ne jańalyq baryn surady, qysqasha aıtyp, dál sizge qatysty jańalyq joq degendi uqtyrdym. Ózim asyǵyp turǵanda qyrshańqylaý anekdottyń birin aıtyp tura ma dep turǵanymda: «Oý, Aıgúl, qartaıǵan adamdarǵa habarlasyp, amandyq surasyp qoısańdarshy, bizge tek daýystaryńdy estisek te kúsh qoı», –dedi... Bul meniń aıaýly da ardaqty, seriligi adaldyǵyna serik bolǵan, qyzyl túske qumar ustazym, áriptesim, ǵalym Asylbek Tasymovpen telefondaǵy bolsa da sońǵy suqbatym ekenin qaıdan bilippin...Bir kem dúnıe...
Asylbek Tasymov týraly aıtar estelik óte kóp, bul tek bir kezdegi stýdenttiń keıingi áriptestiń kózqarasymen jazylǵan estelik-esse ǵana, ǵalymdyǵyn, jazǵan oqý quraldarynyń synyn, sapasyn, ǵylymı tilmen taldamadym, aǵaıdyń zamandastary aıtar áńgimelerdi qospadym. Aǵaıdyń bul ómirden ótkenine de bıyl bir jyl toldy. Asekeńniń artynda qalǵan urpaǵy men jan jary Raısa apaıǵa, qyzy Almaǵa jáne jalpy jamaǵatqa ustazymyz ben áriptesimizdiń jarqyn beınesi máńgi jadymyzda ekenin aıtqymyz keledi. Asekeńniń utymdy ázil-qaljyńdary, jigittik áńgimeleri esimizde, onyń jan dúnıesi alystaǵan saıyn bıik bop kórinetin taýdaı sanamyzda jańǵyryp, kafedramyzda aǵaıdyń ózindik ornynyń oısyrap qalǵanyn jetkizdik.
Aıaýly ustaz, ǵalym Asylbek Tasymovtyń esimi men jarqyn beınesi qazaq til bilimi kafedrasymen birge jasaı beredi.
Ál-Farabı atyndaǵy QazUÝ-dyń fılologıa jáne álem tilderi fakúlteti qazaq til bilimi kafedrasynyń dosenti, fılologıa ǵylymdarynyń kandıdaty Shynybekova Aıgúl
